Advertisement


International

17 octobre 2007

Tout moun a moun, tout nasyon a nasyon

image_defaut
Mots-clés : ,

1)LONI : POUKISA LAGWIYANN NOU PA ANNAN SA ?

Lé vent sis (26) séktanm dé mil sét (2007),annan vil Nouyork péi LÉZÉTAZINI, so sièj, LONI ( LOrganizasyon Nasyon Ini) tchenbé so swasant dézyém(62éme) gran kontré dépi lannen mil néf san karant sis (1946).

Li té gangnen pasé san senkant(150) chéf Déta ouben chéf gouvèlman, mé tout réprézantan san katréven douz(192) Nasyon manm LONI-ya té ka swiv déba-ya asou zafé lapolitik, léconomi, sosyal, lasanté, lasékirité, éksétéra… di tout Nasyon annan LÉMOND

Nou savé li gangnen tout kalité Nasyon. Nasyon ki gangnen bokou moun ké bokou laté ; Nasyon ki gangnen bokou moun ké ti moso laté, Nasyon ki pa gangnen tro bokou moun kou LAGWIYANN, Nasyon ki gangnen tro bokou soumaké ; Nasyon ki pa gangnen. Mé tout Nasyon a Nasyon.

Nou tandé chéf Déta Nasyon BRÉZIL doumandé plis démokrasi pou LONI, ké roun plas annan konsèy sékirité ki sa gouvènman LONI.

Roun patché rot Nasyon pa lé tandé palé di « Drwa Véto » anko. Senk Nasyon (Langlétér, Lachinn, Lézétazini, lafrans, Larisi) ka fè déyé, a yé rounso ki gangnen sa drwa-a pou baré désizyon ki pa ka alé annan yé sans… … … Nou té ké kontan LONI fronmen chapit déziém lagèr « mondjal », swasant(60) lannen pita.

Pannan sa swasant déziém (62éme) gran kontré nou tandé Prézidan LIRAN fé roun gran palô asou zafé larm nikléèr. Li fé nou konprann ki sa plis roun féblés ki roun fors pou roun Nasyon.

LÉZÉTAZINI pédi lagér kont vayan Nasyon VYÉTNAM, yé tou proch pédi lagér yé ka mennen jodla asou laté Nasyon LIRAK. Yé patché bomb nikléèr pa ka sérvi angnen : lafrans ja pédi lagér kont Nasyon LALJÉRI, Nasyon LAKANAKY tou proch trapé so LIBERTÉ…..kont lidé léta fransé ké sopa bomb nikléèr. Fo nou byen kalkilé anlé sa.

Mouché Évo MORALES prézidan LABOLIVI fé roun bél palô asou lajistis ékonomik. Li palé di gro sosyété gran Nasyon ka pran tout richés laté Nasyon pi féb-ya pou prés bontchô. San kalkilé traka yé ka lésé pou pép Péy-a. Li doumandé dirijan gran Nasyon kozé séryé ké gro tchap gro sosyété yé Péy pou fini ké sa fason. Roun ran Nasyon pa pouvé mouri di lafen pannan tan dé trwa rot Nasyon ka mouri di manjé tro bokou ; Fo LONI travay pou kasé sa sistém… …. …. Men bél PALÔ, Annou wè !

Nou lovri tout journal pou gadé si nou té ka wé ouben tandé réprézantan LAGWIYANN ! ANWA.

Asou swasant dé (62) gran kontré di LONI, nou pa fé roun, nou pa menm gangnen roun kajibi annan bidim latour LONI annan vil Nouyork-a. siplétif-ya moyo alé fè panzou alantou Lérop pasé yé gadé zafé LAGWIYANN annan so mitan.

LAGWIYANN sa roun bél Nasyon, so pép a roun vayan pép. Ki sa ki ka fé nou pa andrwa alé palé LONI ké tout rot Nasyon-ya ?

2)A.D.N

moun ké moun, bét ké bét ; Nou sa moun nou pa andrwé fè kou bét

Fanmi a pa disan rounso, mém si disan pès psé dlo, nou gangnen gran fanmi nou ka trapé ti fanmi osi. Pitit a pitit menm si disan diféran.

Pou byen konprann rôt jou-a si yé té gadé zafé A.D.N pou lésé ti-moun yan rantré annan palé lélizé nou kré roun ran timoun nou wé pa gangnen menm disan ké mouché ki trapé drwa di viv annan palé lélizé atchwélman. Mé li gangnen rézon pas a so fanmy. Menm si a pa tout nann yé ka aplé Martin.

Poukisa rot ran moun pa té ké andrwé di viv ké sopa fanmi ? Lô to ka fé lalwa pou pété tchou nég rounso ! Kouman yé pouvé rélé to : RASIZ.

3) DIKTATIR MILITÉR, DIKTATIR KOLONYAL : MENM BÉT MENM PWÉL

LABIRMANI kou LAGWIYANN mè li diféran osi.

Pri dipen ké gazolinn monté rot toubonnman annan péy LABIRMANI pannantan soumaké moun-yan ka trapé pou yé travay pa ka monté di roun santim.

Kou pou LAGWIYANN koté nou wé Bagét dipen monté jouktan li rivé swasant dis santim (0,70 €) yé di nou a pri farinn lafrans ki monté rot toubonman. Pou gazolin-a pa menm palé li ja pran pasé dis santim (0,10 €) ; kat dérnyé mwa ki pasé-ya a nou yé chwézi pou pèyé zafé norm yé Lérop : « A Koté baryé bas béf ka pasé. »

Annan nou Péy LAGWIYANN pésonn pa di « AN épi GNEN » kousidéré chak GWIYANNÉ, nou té pran pasé trwa pikir-chouval.

Moun labirmani pa kouté yé lapè yé pran yé kouraj pasé yé pran kouri séré. Moun-yan désann an lari pou fé yé gouvènman tandé yé pa dakô ké so politik : Pri ka monté salèr pa ka boujé !

Soda birman mové kou kolon fransé-ya, moun-yan pran kout boutou, kout lakrimojén, bal fizi, éksétéra… …. … Chak jou pép birman-an té pi bokou ka désann a lari.

Mwann boudis-ya té douvan, mé tout pép-a vini kontré ké yé pou di diktatir militér-a : AWA, nou lé zot fini ké sa politik-a !

A konran tout nasyon mélé annan zafé LABIRMANI. Mouché Ibrahim GAMBARI réprézantan éspésyal LONI-a déplasé soko annan kapital LABIRMANI-a, Naypyidaw, pou kozé ké tout moun.

Li gadé si li té pouvé ranjé sityasyon pép Birman-an, lô li doumandé diktatir militér-a pa servi fizi pou tiré asou pép-a anko !

Si nou lé LONI gadé noupa zafé pép GWIYANNÉ-a fo nou chanjé kadans !

Mézanmi ki sa ki ka fè ki nou pa ka rivé fé diktatir kolonyal fransé-a tandé mach ! Pi yé ka pijé nou, pi nou ka fronmen nou bouch.

Nou pa menm ka sonjé sa nou pitit ka sonjé lô yé ka wé nou rété san fé angnen. Yé divét ka kalkilé  a kapon rounso li ka rété annan LAGWIYANN.

Moun LAGWIYANN annou pa lésé nou pitit pansé konran tro lontan, nou pa blijé fé gran majô mé kanmêmsa annou fé kichoz pou yé … … … kou nou gangan-ya fé pou nou.

A vrè  li gangnen « sélman » karant lannen diktatir militér-a ka fé pép Birman-an wé mizè pannantan a dépi pasé kat san lannen masogan asou nou do.KANMÉMSA, OROYO !

4) LAJISTIS APA LAVANJANS

Ramon tchenbé réd nou la ké to

Roun aksidan kanno fét asou larô larivyé manna lé sét janvyé dé mil sis (07/01/2006) yé té ka sasé to fré toupatou yé pa rivé jwend ké li jiskaprézan .

Lé kenz séptanb dé mil sis (15/09/2006) yé monté roun konplo pou tchenbé to. To toujou tchenbé menm pozisyon-an, to pa gangnen angnen pou wé annan sa aksidan kanno-a

Roun lannen ké roun simenn pasé yé voyé to divan tribinal pou zafé kriminél yé rivé ba to dis lannen lajol an plas to fré. Gidi-gidi pa ka maré pagra

Pou dosyé ki ka pasé annan tribinal zafé kriminél to pou antann o pi bas, trwa-kat lannen anvan to pasé an jijman. Tro présé pa ka fé jou lovri

Di lajistis kolonyal trotinét yé pasé a roun lajistis kolonyal T.G.V, roun sél kou ! Pou fé tchô yé soda kontan

Asou dis témwen, senk ki bité ké to douvan jij-a pannan ankét-a jouré ki a pa to yé té wé. To avoka lévé mové kolé li poko rivé konprann ki yé voyé roun jénjan ki pa fé angnen lajol.

Lo minis koloni fransé-a tandé yé voyé to lajôl li voyé roun lét pou laprés pou li fé savé li kontan toubonnman.

Kou pou Lendochinn, kou pou laljéri, kou pou lakanaky pou léta fransé pouvé trapé soda pou maté pép ka sasé so libérté li kapab voyé jénnjan lajol pou bon tchô… …. …

ACHILLE Armand





 
 

 
image_defaut

Plage de Montjoly : La mer va-t-elle attendre le dédale administratif ?

Les riverains de la plage de Montjoly devront encore patienter et, très certainement investir ce qui leur reste de leurs économies pour faire face à l’intrusion de la mer dans leurs maisons. Depuis plus de deux ans en effe...
by rotkoze
0

 
 
maripasoula

Vie des communes

AINSI PARLAIT LANETOPITHEQUE Dans le n°1225 de la semaine guyanaise, monsieur Frédéric FARINE s’interroge sur les frontières qui séparent la liberté d’expression, la justice et le devoir de réserve. Il s’agissait d...
by rotkoze
0

 



Aucun Commentaire


Commentez le premier!


Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Connect with Facebook

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>