KAYENN « MINING SYMPOSIUM »
Poukisa yé rivé fè roun gran kontré asou zafè lô nou péy annan trwa pronmyè jou mwa désanm 2011-an, san li ganyen pyès GWIYANè ka sasé lô ki vini gadé sa ka pasé ?
Li té ganyen délégasyon tout péy « boukliyé GWIYANE »-a : BREZIL, SIRINANM, GWIYANA . Palô-a té rot menm, asou métod travay, ròtò (otér) prodiksyon chak péy ké yé politik minyé. Moun LAGWIYANN ka sasé lô pa té la pou tandé sa.
Pitét pésonn pa té di yé anyen, Pitét yé pa té palé ké yé anvan, Pitét yé pa fè sa gran kontré-aannan yé pa sans.
Pannan dé jou kozman asou zafè min lò-ya, nou pa tandé palé di fason pou viré mété Gwiyanè ladministrasyon fransé mété dérô-ya asou plasèr ya . Yé pa palé trop di zafé koripsyon fonksyonér fransé osi.
Pitét a pa té sa asosyasyon ki monté sa « senpozyom » té ka sasé fè !
Pitét yé té lé manjé soumaké linyon éropéyen, Pitét a yé pa réklam yé té ka sasé fé , Pitét falè té trapé roun sistenm pou di linyon éropéyen-an sa nou ka fé ké soumaké yé ka voyé annan nou péy LAGWIYANN.
Li ganyen roun « pol minyè » ké trwa moun ka travay touléjou ka touché gro soumaké. Li ganyen mwens prodiksyon lô, mwens otorizasyon administratif, mwens Gwiyanè ka travay lô ; a klandestin ké sosyété fransé ka manjé nou lô.
Nou té ké anvi konprann poukisa an tan lô té ka vo sèt éro swasant dé (7,62 éro) li té ganyen pasé san GWIYANè ki ka travay lô épi jodla si to bizwen roun gram lô fodré to soti karant dé éro (42 éro) di to poch . Pitét kou nou pankò té ganyen sa pòl minyè-a sa té miyò pou nou!
Li toujou ganyen kenz mil (15 000)« garimpéros » ka pran lô nou péy pou bontchô. Sa pouvé fé touproch ven tonn (20 TONN) lò ka janbé dlo dèyè nou do.
Pannan sa tan-an, Moun ka vandé pi bokou matéryél pou travay lò-a, ki ganyen entérè annan roun sosyétéi élikoptér, ka prézidé komisyon minyé pou kont chanm konmers ké lendistri LAGWIYANN-an (CCIG) , ki vis prézidan Konséy réjyonal ké délégasyon politik minyé, ében a menm moun-an ké rot kichoz ankô !
Pitét a pousa li ganyen kontwar ka achté lò ki lovri PARAMARIBO ké OYAPOK yé ka aplé « KAROL….. ».
Pitét sa « KAYENN SYMPOSIUM MINING » a té roun réklam politik pou bontchô ké noupa soumaké……………..
TIpoul até li ka graté, mété li asou siman li ka graté kantmenm…………..
PRéZIDAN KONSéY RéJYONAL douvan so jij
Kok-a chanté trwa fwè ! Tribinal konvoké li trwa fwè !
Prézidan konséy réjyonal LAGWIYANN konvoké douvan so jij pou trwazyenm fwè, aprè kenz (15) sèktanm , sis (6) désanm sa maré-a, yé roukonvoké prézidan konséy réjyonal-a , pou ventwit (28) févriyé 2012 a wit (8) ér pou li réponn di so méfè.
Nou pankò lé krè ki lajistis fransé ké chéf group ”GUYANE 73”-a ka fè malen ansanm-ansanm pou li pa réponn di so zak !
Pronmyè kou, so avoka fé jij-a savé li té alé sasé so méday “bon ti soda » a lanmen Sarkozy, dézyenm kou-a, jij-a tonbé malkadi, trwazyém kou-a……. Ôroyo ! Nou ka antann pou tandé.
Mé si yé ka konté asou nou pou bat déyé, yé ka pédi yé tan! Pép LAGWIYANN ké dibout ventwit (28) févryé 2012 pou gadé ki komers lajistis fransé-a ké so « siplétif »-ya ké ofri nou pou gadé si yé ka fronmen nou wéy.
BAT MANMAN A PA ANYEN A DOUMANDé PARDON KI TOUT
Arman ACHIL
